Юныя мастакі ГУО "Яслi-сад №101 прынялі ўдзел у гарадскім адкрытым інтэрнэт-конкурсе “Цвяток радзімы – васілёк” i не засталiся без узнагарод

Цвяток радзімы - васілёк

Шырока вядомыя радкі верша Максіма Багдановіча “Слуцкія ткачыхі”:

“Цямнее край зубчаты бора…

І тчэ, забыўшыся, рука

Заміж персіцкага узора

Цвяток радзімы – васілька.”

Сапраўды, васілёк або валошка здаўна быў адным з сімвалаў сінявокай Беларусі. Мы бачым яго і ў буйным жыце, і сярод палявых красак, ягоную выяву народныя мастакі з задавальненнем пераносяць на свае вырабы. Дарэчы, васілёк быў улюбёнай кветкай Марка Шагала. Выхаванцы  нашай групы таксама натхніліся сіне-блакітнымі пялёсткамі і зрабілі самастойныя мастацкія творы. Калі глядзіш на іх, на памяць прыходзяць і вершаваныя радкі Эдзі Агняцвет:

Зямля з блакітнымі вачамі –

Раздолле рэчак і лугоў!

Тут называюць Васількамі

На Беларусі хлапчукоў.

На жаль ні воднага Васілька ў нашай групе няма. Але гэта не перашкаджае нашым дзеткам быць сапраўднымі маленькімі беларусамі, любіць сваю Радзіму, захапляцца яе прыродай і сябраваць з фарбамі ды пэндзлем.

Не так даўно юныя мастакі прынялі ўдзел у гарадскім адкрытым інтэрнэт-конкурсе “Цвяток радзімы – васілёк”. І трэба сказаць, для нашых выхаванцеў зоркі склаліся  вельмі ўдала. Паша Сямёнаў за свой “Кветкавы матыў” у намінацыі “Дэкаратыўна-прыкладное мастацтва” атрымаў дыплом І ступені, а Маша Міхайлава за “Касмічны васілёк” у намінацыі “Выяўленчае мастацтва” – дыплом ІІ ступені. Вось так простая сіняя кветачка стала яшчэ і сімвалам поспеху для нашых юных талентаў.